有兩套戲，我都好鍾意。
一套講希臘英雄。
一套講一隻猴。

隔咗好多年再睇，
發覺佢哋其實講緊同一樣嘢。

男人有時真係冇乜新花樣。

《The Odyssey》裡面的奧德修斯，
形容一種想要又得不到的感覺。

像身上有一下癢。
好想抓。

但原來個癢生喺皮膚底。
抓極都抓唔到。

最初覺得幾得意。
抓耐咗，就要命。

他說，人最想要的，
往往是人最得不到的。

而最得不到的，
又往往是以前有過、
後來失去咗的東西。

希臘人講「愛得太遲」，

都講得好複雜。

至尊寶就唔同。

佢冇講皮膚底的癢，
冇講命運，
亦冇講哲學。

佢只係話：
有一份至真的愛情擺喺面前，
自己冇珍惜。

到冇咗，先後悔。

一句「一萬年」，
香港人由細聽到大。

年少時覺得好笑。
大個咗再聽，
先知周星馳原來唔係淨係搞笑。

佢係將一個男人最肉酸的時刻，
講到全世界都記得。

兩個人，一個在地中海漂流，
一個踩住雲、拎住金箍棒。

講來講去，
都係同一件事：

有些東西在手上時，
人總覺得仲有時間。

父母仲健康，
覺得下個禮拜先飲茶都得。

一個朋友還在香港，
覺得遲啲先約都得。

一間成日去的茶餐廳未執，
覺得下次先食都得。

人生最容易講出口的三個字，

大概就是：遲啲先。

當然，人唔可以日日都活得好似聽日世界末日。

咁樣太攰。
飯都食唔安樂。

不過，夾到食飯就食飯。

約到嘅，就約。

有得講，就早少少講。

有些事，
唔使等到一萬年後先明白。

最想要的，
往往不是未得到的。

是當時明明擁有，
卻以為永遠都在的。

阿芒想同另外99.96%
58,463位同學講:
你們做得好。

無論今日成績單上寫住乜,
無論你下一步去邊間大學、副學士、
抑或未決定嘅路,
請你記住一件事:
你已經完成咗呢個公開試嘅磨練。
喺呢個過程入面,你有全力以赴過,
呢件事本身,已經係一種對自己嘅成就。

喺香港,由出世到死亡,
呢世人唯一一件社會強制要做嘅事,
就係參加一次公開考試。
過咗呢一關之後,
之後嘅路點行、想追求乜嘢、

想成為邊種人,
全部係你自己嘅決定,
冇任何人可以再幫你考。

幾十年之後,
回頭望返今日,你會發覺,
DSE嗰張成績單,
冇你今日想像中咁重要。

但你亦會發覺,
呢個備戰、應試、
承受壓力嘅鍛鍊過程本身,
對你嘅成長,反而幫助更大。

今日跌咗一跤,
唔代表你之後行唔到路。

By the way
幾乎每一位選擇讀醫科嘅狀元,
接受訪問嗰陣都會講一句:
「我想貢獻社會。」

呢句冇問題,亦好值得尊重。
但暫時未見過有一位狀元,
對住鏡頭,坦白講埋另一句:
「我亦好重視醫生呢份工嘅豐厚收入。」

呢個唔係批評,
只係想指出一個事實——
社會對「貢獻」呢個詞,
好似預設咗,
只有某幾種職業先夠格講得出口。

58,463位同學:
香港賺錢嘅途徑,
遠遠唔止得一種。
社會要人貢獻嘅途徑,
亦遠遠唔止得一種。

搵到屬於你自己嘅專長,
喺你揀嘅嗰個領域裡面,
慢慢發光發亮,
將來你嘅收入,
同你對呢個社會嘅貢獻,
說不定會比一個醫生仲要大。

《表裡見聞錄》講嘅,
就係一班喺唔同領域,
努力賺咗二十年錢之後,
開始覺得:
是時候做啲事,
貢獻返社會嘅人嘅故事。

呢班人,冇一個係狀元出身,
冇一個做醫生,
但佢哋一樣行到自己嘅位置,
一樣有能力回頭做啲事。

今日嘅成績表,
只係人生第一頁,
唔係結局。
加油。

By 阿芒

Christopher Nolan嘅《The Odyssey》今日第一日上畫，
Matt Damon演嗰個流浪十年都要返屋企嘅Odysseus。
我即刻急不及待，拉埋太太一齊去睇。
睇完，我得出三個非常不希臘、但非常實用嘅結論。

1.絕對唔好得罪大人物個仔。不論誰對誰錯。

Odysseus去到Poseidon個仔Polyphemus嗰個洞穴，
明明係自衛，但刺盲咗人地隻眼，
換嚟嘅係波塞冬十年嘅追殺同報復。

資本世界一樣——
世界唔係每次都會按道理結算；
有時你贏咗道理，輸咗後面嗰張關係網。

太太聽完，
好欣賞咁望住我，
話我好有智慧。

2.越成功嘅人，一旦唔喺度，屋企人嘅處境就越危險。

一個人建立起嚟嘅地位、資產同秩序，
未必會自動留低嚟保護屋企人。
有時反而會吸引更多人，
想趁主人不在，行入去坐低。

太太聽完，
好欣賞咁望住我，
話我好顧家。

3.Odysseus 根本係一個極限愛好者。

因為老婆唔畀佢玩，
所以要喺出面試晒所有極限體驗，
先肯漂返屋企。
途中仲遇到Calypso ,
大導演仲識玩, 搵 Charlize Theron 飾演。

我只可以講：
有啲男人對「返屋企」嘅理解，
係一定要去到全世界最遠，
先至肯承認屋企係最好。

太太聽完，
即刻叫我PayMe返戲飛錢俾佢。

三千年前嘅史詩，去到今日，
仲係講緊同一件事：

人有幾叻、有幾成功、去得幾遠，都唔代表你知道點樣安全返嚟。

《表裡見聞錄》都係一個關於返屋企嘅故事。
只不過阿芒喺資本世界入面遇到嘅海怪，
通常唔會有牙。
佢哋有西裝、有名片、
有一份睇落好合理嘅計劃書。

細細個去到戲院門口，
有三套戲揀：
一套周潤發，
一套周星馳，
一套成龍。
當年有個稱呼，叫做「雙周一成」。

好幸福。

想像一下，你可以行到戲院門口，
先至慢慢諗究竟睇邊一套。
因為實有一套你會有興趣——
賭神會唔會贏一鋪大嘅 ？
星爺又會點樣扭盡六壬 ？
全天下男人佢又拍咗啲乜危險動作？

嗰個年代，戲飛唔使五十蚊，
一個檔期有四、五套片任你揀，
票房動輒二千萬起跳。
八十年代，
全香港有百九幾間戲院，
幾乎隨街都有得睇。

尖沙咀有間海運戲院，1969年開業，
曾經係嗰邊嘅地標戲院。
李小龍嗰套《唐山大兄》，
當年就係喺嗰度首映，
戲院結業嗰日尾場都用呢套送別。

後來嘅事，大家都知。
NETFLIX 串流興起，
北上消費，
戲院結業一浪接一浪——
單係2021年UA院線全線倒閉之後，
呢幾年已經有三十幾間戲院陸續離場。

舊年，海運戲院結業，
五十幾年嘅老地標，
正式變成一句「集體回憶」。
今日，全港得返四十幾間戲院，
不足當年三分之一。

有人話係因為租貴，
有人話係業主寧願丟空商舖都唔肯減租，
因為要交代銀行嗰邊嘅壓力。

戲院攪成咁，電影又點呢？

到咗2026年，你都仲有三套揀㗎。
一套係梁朝偉做嘅，
一套係張家輝做嘅，
一套係古天樂、宣萱、林峯做嘅。
戲名？

《滙豐尊尚理財 Premier Elite》
《恒生優越理財 Prestige Family+》
《星展豐盛理財 DBS Treasures》

佢哋一樣企喺巨型燈箱底下，
一樣俾燈光打到好靚。

以前燈箱上面寫嘅，
係戲名，寫邊個演、
寫你今晚會入去一個咩世界。
今日燈箱上面寫嘅，
係年利率，寫回贈幾多，
寫你要存幾多錢先有資格行入去。

而且，
今次冇對白，
冇劇本，
冇你可以想像落去嘅結局。
淨係得一句：「開戶即享現金獎賞」。

當年街口嗰間戲院，今日都變咗銀行。

在香港，文字創作不容易，
用文字設計一個 universe 更加無比艱難。
不過，好好玩。

最後，因為我真係完全唔識搞宣傳......

所以如果你喜歡我寫嘅野，please like and share