各位朋友，阿芒今日唔講即時市況，我想講多啲未來嘅部署，五年規劃出咗，民生部分大家點睇，相信每個香港人嘅心入面都有把尺。樓住得好唔好、份工穩唔穩、人工夠唔夠追生活成本，唔係睇完幾句政策口號就會即刻有答案。日子唔容易，大家咬緊牙關，共勉之。
今篇文，我哋唔講口號，唔講情緒，只講「資本」：政府想點樣吸引全球資金？吸引到新錢之後，香港有乜嘢值得佢哋買？有咩資產可以配置？港股又有冇能力培養出第三代、令全球大資本願意搶購嘅核心公司？
我除咗係一個專業投資者，亦都係一個長遠政策研究者：唔係見到政策會推廣股票市場就叫大家買股，而係提醒自己要睇清楚，政策背後嘅資本最終會流去邊度，邊類企業有機會真正受惠，邊啲只係借題發揮。我想喺度做好自己最擅長嘅事：由政策、資本流向、產業結構同企業盈利去拆解，香港股市未來五年可能出現乜嘢變化。
開始之前先多謝一直有 Like、留言同關注阿芒嘅朋友。你哋每一次互動，都令我知道我寫嘅野有人願意一齊睇、一齊思考。
成份嘢咁長，先睇最關散戶事嗰頁
成份《香港第一個五年規劃》咁長，正常散戶第一反應可能係：「唔係呀嘛，買股票已經要睇業績、睇公告、睇估值，仲要睇政策文件？」所以我哋直接跳去第二篇、第六章「國際金融中心」。
睇到呢度，我好似發現咗啲嘢。今次一開波已經開宗明義講：金融係香港嘅「根本和最大的優勢」。大佬，以前D施政報告邊有咁直接呀?
再睇落去，第一節講嘅係強化全球離岸人民幣業務樞紐、國際資產及財富管理中心，同埋國際風險管理中心。
講得貼地啲，我嘅理解係：
第一步，政府想辦法令更多錢願意來香港、放喺香港、由香港管理。
文件直接提到，香港會完善監管同市場基建、壯大專業服務生態，並優化基金、單一家族辦公室同附帶權益稅制，目標係吸引更多國際同內地家族資本及長期資金落戶香港，擴大資產及財富管理業務。
呢個方向本身冇問題，而且非常重要。港股要健康，唔可以淨係靠散戶一日買、一日沽，更加唔可以單靠短線資金追題材。真正可以托住大型IPO、長期承接優質企業、改善市場估值中樞嘅，往往係長線機構資金。
如果更多主權基金、家辦、保險資金同資產管理機構喺香港建立配置中心，佢哋未必第一日就衝去買港股；佢哋可能先買債券、貨幣市場基金、私募資產、REITs、保險產品或者另類投資。
資金先落戶香港，先有機會逐步變成香港資本市場嘅買家。市場最怕嘅，唔係冇故事；係冇錢接貨。
重點係：「然後呢？」吸引到錢之後，啲錢買乜？
有睇開我啲文嘅朋友一定知道，阿芒最鍾意靈魂拷問 And then what?
就算你真係成功吸引好多新錢來香港，咁啲錢最後買乜呢？
港紙定期？
美債？
貨幣市場基金？
海外私募基金？
量化？
佘詩曼梁朝偉啲保險？
定係最後照樣將大部分資金買返美股科技巨頭？
就算佢哋買盈富基金，又解決咗幾多問題？如果新資金最後只係買盈富基金、買幾隻高息銀行股、買成熟平台股，香港市場可以多咗成交、多咗資產管理規模，但未必代表香港真正建立咗下一代科技資產嘅定價能力。
講白啲：
吸引到錢來香港，只係Step 1。
令啲錢有足夠理由買香港未來，先係Step 2。
如果香港只係一個資金停泊站，資金可以停泊，亦可以隨時離開。但如果香港有一批全世界都想配置、唔研究就怕錯過嘅旗艦企業，資金先會真正留低、研究、建倉，甚至長期加碼。
所以香港唔可以只做「有錢人放錢嘅地方」，仲要做「有錢人覺得唔買就會錯過下一個十年嘅地方」。
去到第二節「優化股票和債券市場」，個邏輯就更加清楚。
政府提出，要圍繞股票同債券兩大核心市場，優化制度設計同產品生態，提升市場深度、廣度同流動性；一邊協助內地企業「走出去」，一邊吸引國際資本「引進來」。文件亦明確提出，要加強上市制度競爭力、提高證券市場基建營運效率，支持內地及海外行業龍頭與優質新興產業企業赴港上市。
翻譯做散戶聽得明嘅版本，其實就係：
第一節，係整大個資金池。
第二節，係整靚個資產池。
1 + 1 兩樣加埋，再靠交易、結算、互聯互通同風險管理，整深個流動性池。
有資金池，未必有牛市。
有資產池，未必有估值。
有成交，亦未必代表市場真係健康。
但當資金、好公司、流動性同新經濟旗艦資產同時出現，市場先有機會形成真正嘅重估。
Disclaimer: 以下內容只係本人嘅個人猜想，不構成任何投資意見或建議。
如果你問我，港股未來最需要乜？
我會話：香港需要第三代熱門股票，或者叫第三代核心資產。
第一代港股核心資產，係傳統金融、地產、公用股、內銀呢類型資產。呢一代代表香港最原始、最強嘅優勢：國際金融中心、成熟市場制度、收息文化、跨境金融服務，同埋香港作為中國資本市場入口嘅地位。
第二代核心資產，係騰訊、阿里巴巴、美團、小米等中國新經濟代表。
當年全球資金想投資中國互聯網、遊戲、電商、雲端、本地生活、智能手機、移動支付同消費升級，香港係一個非常重要嘅窗口。騰訊同阿里唔只係兩間公司，佢哋其實係一個時代嘅資產符號。
第二代港股最成功嘅地方，係令國際資本覺得：如果你唔研究香港上市嘅中國新經濟公司，你有機會錯過中國最重要嘅互聯網增長周期。
但係，以上所有企業已經一早進入絕對龍頭的成熟階段。佢哋仍然係好公司，仍然有龐大現金流、盈利能力、回購能力同投資價值；但耐心資本嘅市場永遠都會問下一句：
再下一個十年，香港有乜嘢新故事？
有邊批港股，值得全球耐心資本提高配置？
呢度就講到主題：第三代。
第一代港股，買香港金融中心。
第二代港股，買中國互聯網。
我認為，第三代港股，市場會買嘅，一定要包括中國下一輪科技競爭力：例如 AI。
第三代港股，唔係AI概念，係AI核心資產群
香港未來第三代熱門股票，唔可以只靠一兩隻AI概念股，更加唔可以靠公司改個名、加兩句「AI轉型」就當自己係新經濟。
真正嘅第三代核心資產，應該係一個完整嘅AI科技資產群。
不評論個別股票潛力，暫時市面上買得到嘅有100 & 2513 做AI大模型、供應算力、中芯、華虹、兆易、瀾起芯片、晶圓、伺服器、光模組、中際旭創（3308）、劍橋科技（6166）同長飛光纖光纜（6869）
仲有勝宏科技（2476）同建滔積層板（1888）PCB、數據中心設備同關鍵材料。
仲有幾十隻相關股票我就唔逐一列出啦。
大型資金第一步，通常會先研究最具代表性、市值最大、成交最深、業績最清晰、最容易建立大倉位嘅旗艦企業。當旗艦企業被重新定價，研究報告、ETF配置、衍生工具需求、供應鏈訂單同市場注意力，先有機會慢慢向第二梯隊、第三梯隊擴散。
BUT , smart money 從來唔會平均灑落所有股票。佢哋會認真挑選。
所以港股要真正重新大旺起來，唔只要「多啲股票IPO」，嚟香港融完資就算，而係要有10隻8隻令全球資金覺得非研究不可、非配置不可嘅新世代旗艦資產喺香港獨家上市。Hong Kong Exclusive
港股能唔能夠重新建立吸引力，最終要睇台上有冇幾間年輕又有活力嘅新公司，值得全世界真金白銀坐低睇戲。
我哋而家要做嘅，係未雨綢繆
既然係咁，對專業投資者而言，而家最值得做嘅唔係見到AI兩個字就追，而係未雨綢繆，開始建立自己嘅「第三代港股觀察名單」。
我之後會用「AI新城」呢個框架，逐步拆解港股AI產業鏈：大模型、企業AI、互聯網平台、AI終端、國產算力、半導體、光通訊、數據傳輸、PCB同電子材料。
但要戴返頭盔先。
AI板塊最危險嘅，係市場將十年後嘅夢想，一日之內炒晒入股價。
要搵真正有潛力成為第三代核心資產嘅公司，至少要睇五樣嘢。
第一，佢係咪真係處於AI價值鏈核心，而唔係只做邊緣業務、靠概念宣傳。
第二，AI有冇變成可驗證嘅收入、訂單、毛利率改善或者現金流，而唔係淨係管理層話「前景廣闊」。
第三，公司有冇技術、客戶、供應鏈、數據、品牌或者資本規模形成護城河。
第四，佢嘅成交、市值、股東結構同研究覆蓋，係咪有條件成為機構資金可以長期配置嘅資產。
第五，最重要：個估值有冇已經貴到將所有好消息預先反映。
如果我哋可以喺市場仲未完全形成共識之前，睇得清楚政策方向、產業位置、企業盈利能力同估值風險，我哋就有機會唔止係追故事，而係提早發現未來核心資產。
香港唔缺資本。
香港真正要解決嘅，係有冇一批股票，令資本覺得非買不可。
尾聲
講到尾，阿芒都想講少少個人感受。
我嘅性格一向唔鍾意批評任何人，亦都習慣凡事向好嘅方向諗。政策有政策嘅考慮，市場有市場嘅規律，每個人睇法都可以唔同。
但坦白講，作為一個土生土長、喺香港生活咗四十年嘅香港人，睇完呢份報告，心入面始終都會問自己一句：
「我最喜愛嘅呢個城市，將來會變成點呢？」
會擔心，其實好正常，係咪先？畢竟而家個世界咁亂，地緣政治、科技變革、經濟周期、生活成本，冇一樣係簡單。
不過再諗深一層，其實香港咁多年都係咁走過嚟。順景有順景嘅顧慮，逆境有逆境嘅考驗。與其將希望寄託喺別人身上，等佢幫我哋解決所有問題，不如將更多希望擺返喺自己身上仲實際。
照顧好自己，睇多啲書，飲多啲水，做好功課，管理好風險，專注返自己真正控制到嘅事情。
投資都係一樣。你控制唔到政策幾時落地，控制唔到市場聽日升定跌，控制唔到世界局勢點變；但你可以控制自己有冇持續學習、有冇做好研究、有冇留足安全邊際、有冇喺情緒最亂嗰陣仍然守得住紀律。可以慢慢研究，耐心等候，喺真正明白嘅地方落注，就係未來5年最重要嘅優勢。
呢個城市有好多嘢值得感恩同欣賞。香港仍然有好多人努力做事，有好多值得守護嘅價值。
未來嘅嘢冇人估得到。時間到，係好係壞，一切都會有答案。
萬物皆有時，活好每一天。