大家好，我係AI專業投資者阿芒。踏入10月，AI港股真係成日坐過山車。有睇開我富途文章嘅朋友，都知道我由9月1號開始就一直好婆媽咁提醒大家：唔洗急住入貨，唔洗急住入貨，唔洗急住入貨！尤其唔好因為怕錯過，FOMO，就急急腳做決定。
如果之前阿芒嗰幾十篇長文，有幫大家忍一忍手，冇急住追入，咁呢一轉就避開咗一段跌浪，個荷包都少受啲傷。唔敢話次次睇啱，但 so far 嗰句「唔洗急住入貨」，總算冇白講。
有時做功課嘅回報，唔係即刻賺多幾多，而係幫我忍住手，少蝕一筆冤枉錢。而家經濟唔好啊，慳得一蚊就一蚊。如果真係幫大家蝕少咗，哪怕只係一蚊，都請畀個 like & 關注我，等我知道婆媽有婆媽嘅價值；阿芒都有阿芒嘅價值。
跌咗一半，抵買未？
呢排好多朋友問：「呢隻買得未？」「而家應該走，定繼續揸？」老老實實，具體買賣價位，我未有足夠把握，就唔亂講。我唔想今日是但畀你一個意見，聽日攪到你為嗰個數字提心吊膽。
但有一個數據，今日我可以攞出嚟同大家一齊享用。佢唔會直接話畀你聽幾時買，但可以幫你拆穿一個好常見嘅錯覺：「由歷史高位跌咗咁多，應該好平啦啩？」
假設一隻股票曾經升到歷史高位100蚊，今日跌返50蚊。阿芒睇好佢，認為一年後公司值70蚊，於是用50蚊買入。
我個老best巴哥持有同一隻股票，但覺得前景轉差，未來可能連50蚊都唔值，於是沽出。
成交嗰一刻，兩人都覺得自己好醒，做咗個明智決定，望住對方嘅眼神，盡在不言中。
我心諗：「好彩有人肯平賣畀我。」
巴哥心諗：「好彩仲有人肯接。」
係咪有趣？同一個50蚊，一個當寶，一個當燙手山芋。所以我真正要問嘅，唔係「邊個咁傻賣畀我」，而係：
「我話佢值70蚊，理據係乜？對方都係勁人，佢擔心嗰啲問題，我有冇睇漏？」
以前賣100蚊，唔代表今日50蚊一定抵。百貨公司減價，你都會睇睇件貨係咩質地；買股票反而淨係睇折扣牌，係咪做漏咗啲嘢？
要答呢個問題，有好多把尺。今日，我哋先用最容易理解嗰把：IPO 招股價。
今日去AI新股商場，先睇返張原價價錢牌
呢啲新股上市都未夠一年，基本面唔會有好大改變。為咗方便理解，我哋做一個好簡單嘅分類，用招股價當參考價錢牌 (suggested retail price)：
-原價：IPO發售價。
-折扣價：今日價位低過IPO價。
-炒價：今日價位高過IPO價，係本文嘅趣味稱呼，唔代表一定高估。
以上係今日比較用嘅標籤，唔係估值判決書。公司可以成長，原價亦可以定得貴。但呢把尺有一個好處：唔會畀歷史最高價牽住個鼻走。
一件貨原本賣100蚊，後來有人炒到500蚊，今日跌返300蚊——由山頂計，的確平咗四成；但由原價計，佢仲係三倍。
你以為自己行入outlet，原來只係炒價由超辣變中辣。
好，依家就睇下呢20隻AI相關新股，今日張價牌寫緊乜。以下全部最新價格統一採用2026年10月13日收市價。
第一區：以為大減價，其實仲係炒價
15 隻裡面，有 10 隻仍高於 IPO 價格 30% 以上
深演智能（02723）
招股價55.50 → 收市價565.00港元｜升918.02%｜2026年5月27日上市。
呢件貨，原價55.50，今日炒價565，係原價約10.18倍。
所以如果有人同你講「深演跌咗好多，好平」，你首先要問：「同邊個價比？」
如果同更高嘅炒價比較，係回落咗；但同上市起點比較，佢仲企喺十倍價格附近。唔係話公司一定唔值，而係你要解釋到畀自己聽：上市至今，乜嘢改變足以支持呢個價格？
智譜／Z.AI（02513）
招股價116.20 → 收市價601.00港元｜升417.21%｜2026年1月8日上市。
智譜有3張價牌。7月13日完成以1,588港元配售1,978萬股新H股；9月16日再以714港元配售2,196.5萬股新H股。
今日六舊水，較IPO價仍升417.21%，但較7月配股價低約62.2%，亦較9月配股價低約15.8%。即係IPO入場嗰批仲賺幾倍，7月參與配售嗰批就承受六成有多嘅帳面跌幅，9月入場嗰批亦未返家鄉。同一隻智譜，有人覺得買中寶，有人覺得上錯車，分別就係張單寫住幾錢。而且公司9月唔止配股，亦完成發行本金人民幣201.40億元嘅零息可換股債。
值唔值六舊水，唔係由佢價格曾經升到幾高決定，而係由你買到一盤價值點樣嘅生意決定。
瀾起科技（06809）
招股價106.89 → 收市價241.80港元｜升126.21%｜2026年2月9日上市。
瀾起今日價格仍然係招股價約2.26倍，跑入今次榜單前三。
用商場語言講，就係原來一百蚊左右嗰件貨，今日仲賣二百幾。你可以認為佢已經升級成更好嘅產品，但唔可以只見到個價回落，就叫佢「半價貨」。
兆易創新（03986）
招股價162.00 → 收市價360.20港元｜升122.35%｜2026年1月13日上市。
兆易同瀾起好接近，同樣由上市起點計翻倍。
今次20隻之中，只有頭四隻較招股價升超過一倍。佢哋嘅共同特點，係價格已經遠離IPO起點；研究今日值唔值得買，就要搵到今日嘅理由，唔係只攞以前嘅高位做理由。
英矽智能（03696）
招股價24.05 → 收市價43.62港元｜升81.37%｜2025年12月30日上市。
英矽原價24.05，今日炒價43.62，仍高八成有多。
如果你係IPO買家，呢份帳面成績唔錯；如果你係今日先入場，就唔好將人哋已經賺到嘅升幅，當成自己將來必然有嘅回報。上一程有人食到，唔代表下一程照樣派餐。
天數智芯（09903）
調整後招股價48.20 → 收市價84.90港元｜升76.14%｜2026年1月8日上市。
天數要先講清楚「包裝份量」。按今次整理嘅送股口徑，原招股價144.60港元，每1股獲發2股資本化股份，1股變3股，可比招股價就係48.20港元。
原本一大盒，拆成三小盒，你唔可以攞一小盒嘅價錢，同以前成盒比較，然後大嗌：「平咗好多！」用返同一股數基準，天數仍然升76.14%。
迅策（03317）
招股價48.00 → 收市價71.60港元｜升49.17%｜2025年12月30日上市。
迅策亦係「兩張單、兩種心情」。公司7月公布以107.70港元配售728.3萬股新H股，預計淨集資7.71億港元；同時建議發行人民幣13.60億元、以美元結算嘅零息可換股債，初始換股價123.86港元。今日71.60港元，較當時公布嘅配股價低約33.5%。公司當時提出嘅融資價格，同今日市場成交價已經拉開。只講「IPO至今升近五成」，就會漏咗中間嗰段唔容易嘅旅程。
壁仞科技（06082）
招股價19.60 → 收市價28.24港元｜升44.08%｜2026年1月2日上市。
壁仞唔止兩張價牌，係三張。
IPO 19.60港元；7月配股價46.20港元；10月再以31.08港元配股，已於10月12日完成。今日28.24港元，仲高過IPO，但較7月配股價低約38.9%，連啱啱完成嘅10月配股價都低約9.1%。係公司多咗資源；舊股東持股比例被攤薄，亦係現實。錢入咗公司，唔代表盈利入咗你個袋，更唔代表股價一定守住融資價。
MiniMax（00100）
招股價165.00 → 收市價212.00港元｜升28.48%｜2026年1月9日上市。
MiniMax亦有一張唔可以漏嘅268港元價牌。公司7月14日完成以268港元配售3,560萬股新A類股份；同月亦完成發行零息可換股債。今日212港元，較IPO高28.48%，但較配股價低約20.9%。
所以問「MiniMax係咪減價」，答案係：相對7月配售價，係；相對IPO價，唔係。先講清楚比較基準，兩句都啱，打和super。
其餘6隻數據
格式：招股價 → 10月13日收市價｜升跌幅｜上市日期。
-五一視界（06651）：30.50 → 45.56港元｜升49.38%｜2025年12月30日。7月配股價73.20港元，今日較配股價低約37.8%
-劍橋科技（06166）：68.88 → 95.00港元｜升37.92%｜2025年10月28日。
-曦智科技－P（01879）：183.20 → 238.20港元｜升30.02%｜2026年4月28日。
-海致科技集團（02706）：27.06 → 32.14港元｜升18.77%｜2026年2月13日。
-劑泰科技－P（07666）：10.50 → 11.78港元｜升12.19%｜2026年5月13日。
-景旺電子（03228）：69.88 → 71.75港元｜升2.68%｜2026年9月29日。
第二區：真・跌破發行價，但有折唔等於執到寶
中際旭創（03308）
招股價980.00 → 收市價890.00港元｜跌9.18%｜2026年7月30日上市。
中際而家大約係IPO價嘅九一折，每股平咗90港元。公司名氣大，唔代表原價一定抵。今日比招股價低，證明價格有折扣；至於值唔值得執返件貨，就要研究件貨本身，唔係只睇個品牌招牌。
明略科技－W（02718）
招股價141.00 → 收市價31.00港元｜跌78.01%｜2025年11月3日上市。
明略就唔係普通折扣，而係二二折。原價141港元，今日31港元，上市未滿一年，每股已經少咗110港元。
嗱，呢個幅度唔可以叫「健康回調」，對IPO持有人而言係嚴重損失。但亦唔好見2折，就覺得買到一定抵。
其餘3隻數據
-納真科技（09856）：32.96 → 30.68港元｜跌6.92%｜2026年9月22日上市。
-勝宏科技（02476）：209.88 → 172.80港元｜跌17.67%｜2026年4月21日上市。
-滴普科技（01384）：26.66 → 17.86港元｜跌33.01%｜2025年10月28日上市。
特別篇：7709唔係新股，唔好行錯舖
初始發行價7.80 → 收市價26.10港元｜升234.6%｜2025年10月16日上市。
7709更加刺激：中間衝上歷史高位193.65，係初始價24.8倍；到今日26.10，較歷史高位回落86.5%，但仍然高過初始價兩倍有多。不過，佢係每日槓桿產品，唔係一間企業嘅股份。初始發行價只係產品起步時嘅單位價格，唔係SK海力士嘅估值。呢隻最值得記住嘅係：暴跌唔等於抵買。
睇完價錢牌，先至開始講價值
睇晒20隻，你會發現一樣嘢：好多人覺得AI股已經「跌到好平」，但按今次整理嘅價格，仍然有15隻高過IPO，只有5隻低過IPO。
咁係咪15隻都唔買得，5隻破發就全部抵買？梗係唔係。
招股價係起點，唔係企業價值嘅天花板，亦唔係地板。真正重要嘅係價值有冇跟住變。
一家公司原本值100，幾年後生意做大、盈利增加，可能值得更高價格。你唔可以永遠拎住當年100蚊嗰張單，話所有更高價格都係炒作。
相反，一家公司原本定價100，後來生意轉差，今日跌到30，亦唔會因為有七折優惠，就自動變成好投資。
And then what？
「跌咗」係價格事實；「抵買」係價值判斷。中間仲差一份功課。
成日講價值投資，到底喺點做價值投資？係咪跌咗就買，買完唔郁，然後同自己講：「我 strong hold 」？嗱，咁容易就做到價值投資者，大家都唔使做功課啦，何不直入VOO / QQQ / 2800？
價值投資者真正關心嘅，係兩件事：第一，市場畀出嚟嘅價格合唔合理 (參考美光 Micron Technology 同埋 AMD)；第二，你願唔願意等待企業喺長期之中創造價值 (參考 Google 同埋 Meta)。唔係純粹等個價升返，而係等盤生意真正做大、做強，令你持有嗰份股權更值錢 (參考英偉達 NVIDIA 同埋蘋果 Apple)。
新股睇完，仲有班老朋友未出場
今日我哋用招股價，同埋幾隻公司嘅配股價，先幫自己校準位置。下一步，先輪到收入、盈利、現金流、競爭力同融資用途，去回答個價到底有冇道理。
講到呢度，有朋友可能會問：「咁建滔積層板（01888）、華虹半導體（01347）、聯想集團（00992）、中芯國際（00981）呢？唔講埋？」梗係冇唔記得。不過今日先集中睇20隻新股嘅價錢牌，呢班上市較耐嘅老朋友，篇幅有限，下次再講。仲有騰訊控股（00700）、阿里巴巴（09988）、小米集團（01810）幾位大佬，到時我哋由「上市賣幾錢」，行多一步去睇「盤生意今日值幾錢」。
價格及上市日期沿用本次整理資料，截至2026年10月13日收市；未計股息及交易成本。以上屬資訊及市場觀察，不構成投資建議。
最後講句：股票商場冇規定你今日一定要買嘢
如果你之前選擇唔急住入貨，保留現金、保留選擇，係一個明智決定。
如果你已經喺高位買入，亦唔需要責怪自己。大家都會有被氣氛推住行嘅時候。最有用嘅唔係同個成本價鬥氣，而係將今日得到嘅資料，變成下一次更好嘅判斷。
做呢啲比較，絕對不是想笑邊個買貴咗。我都係真金白銀喺市場入面十幾廿年，知道一張買入單背後，可以係幾個月、甚至幾年辛苦儲返嚟嘅錢。
所以我哋一齊學：唔好見到「減價」就興奮，亦唔好見到「升咗好多」就眼紅。入商場可以行下、睇下、比較下，市場聽日仲會開，唔一定每次都要拎住袋嘢返屋企。
講返開頭，其實如果早啲由8月，甚至7月開始寫呢啲長文，同大家拆清楚，可能會更有幫助。不過真係搞唔掂——芒仔芒女成個暑假都黐住我，阿芒日頭做爸爸，夜晚做功課，邊有時間做作家寫文呢，唯有等兩位小朋友9月1號開學，我先可以正式開工寫長文咁囉。
Anyway，遲到好過冇到。暑假陪仔女，開學陪大家做功課，兩邊都係心機，兩邊都想做到最好。之後阿芒會繼續寫，希望每篇都幫大家睇清楚少少，少啲衝動，多啲判斷。
如果睇完覺得有用，送個 like 畀我，支持小弟繼續寫落去啦！婆媽有婆媽嘅價值，阿芒就繼續用功課交代自己嘅價值。
大家而家手上面持有邊隻 AI 港股？係高位入咗，定係而家睇緊想撈底？不妨留言講下你嘅睇法。