各位朋友，我係富途牛牛AI專業投資者阿芒。
q.futunn.com/hk/profile/21649895
今朝開市，AI股又受壓，望住個倉，大家未必有心情聽古仔，呢點我好明白。
尋日預告咗今日會請兩位朋友出場，我哋照樣見面。呢個故事幾日前已經準備好，今日拎出嚟，只係想換個角度，一齊睇清楚啲數字，唔係要大家回頭檢討。
今日有心情，就坐低聽我講埋個古仔；暫時未有心情，留返遲啲睇都得，篇文唔會走。
上篇，我哋睇咗過去52星期邊啲港股炒得最勁，將38項港股及產品嘅52周高低位換成百分比，再分成三組排名。未睇過嘅朋友，可以先收藏返上篇嘅排名同計法，有時間再慢慢睇。
數字有咗，排名睇埋，And then what？
今日我哋將啲百分比，換成真金白銀。假設手上有100萬，買入唔同組別，最行運同最黑仔，可以係咩畫面？
平時聽唔少朋友講：
「科技股太危險喇，都係買返啲傳統股，穩穩陣陣好過啦。」
好，今日請兩位朋友出場，幫我哋將呢條數攤開睇。
第一位叫水哥，今次佢行運一條龍，買乜中乜。另一位叫阿福。個名就好有福氣，可惜今次個劇本唔就佢，要佢做一回地獄黑仔王。
同樣100萬，同一份股票名單，兩個人最後可以差幾遠？
開始之前，如果你鍾意呢種一齊研究得嚟又輕鬆幽默嘅文章，記得關注《800萬專業投資者阿芒》，順手畀個Like。等我知道，呢條做功課嘅路，唔係得我一個人行。
尋日望上，今日調轉個方向
尋日，我哋由水哥行運一條龍嗰邊望，用低位做起點，計去到高位，相差幾多：
（高位－低位）÷低位×100%。
將每項計完，再喺各組入面取平均，結果係：
-大型龍頭科技股組：平均差幅約109%。 -傳統熱門股組：平均差幅約63%。 -AI概念股及相關產品組：平均差幅約711%。
今日就用埋阿福嗰邊望，換高位做起點，計去到低位，本金會減少幾多：
（低位－高位）÷高位×100%。
同一段價格距離，起點唔同，計出嚟嘅百分比亦唔同。
逐項用新公式計一次，再喺各組入面取平均，結果係：
-大型龍頭科技股組：平均跌幅約46%。 -傳統熱門股組：平均跌幅約36%。 -AI概念股及相關產品組：平均跌幅約80%。
呢三個數字，就係阿福嗰份示範嘅由來。
今日唔再逐隻列跌幅。我想大家睇清楚嘅，係同一份名單換個起點，對本金會有幾唔同嘅影響。
先講清楚兩位朋友嘅遊戲規則
今次每個組合放100萬，組合入面每項分配相同本金，先唔理高低位出現嘅先後次序，亦唔計交易費用。
即係將每項歷史高位同低位攤開，做個數學示範，睇吓兩端價格換成真金白銀，分別有幾大。
水哥負責示範最靚嗰一面，阿福就辛苦啲，幫大家行一次最黑仔嗰條路。
兩位都係純屬虛構角色，大家千祈唔好代入角色，更加唔使拎住自己個倉嚟比較。
好，條數交代清楚，兩位朋友出場。
水哥：買乜中乜，靚到盡
水哥今次行運一條龍，隻隻最低位入貨，最高位出貨，靚到盡。
同樣100萬本金：
-買龍頭科技股嗰組：賺109%，變成209萬。 -買傳統熱門股嗰組：賺63%，變成163萬。 -買AI概念股及相關產品嗰組：賺711%，變成811萬。
嗱，水哥買AI嗰組，真係贏到開巷。
同樣100萬起步，喺呢個極端示範入面，另外兩組都未去到三百萬，佢已經去到八百幾萬。
淨係望住水哥張成績表，當然好吸引。
但仲有阿福未出場。
阿福：同一份名單，另一種際遇
輪到阿福，個畫面就調返轉。
隻隻最高位接咗火棒，再喺最低位出咗貨。今次真係做足地獄黑仔王。
同樣100萬本金：
-買龍頭科技股嗰組：最後剩返約54萬。 -買傳統熱門股嗰組：最後剩返約64萬。 -買AI概念股及相關產品嗰組：最後剩返約20萬。
水哥望住AI嗰組，見到嘅係811萬；阿福望住同一組，戶口就剩返20萬。
同一份名單，一個八百幾萬，一個二十萬。
嗱，今次唔係爭少少喇。
阿芒將兩個版本擺埋一齊，想大家睇嘅係個價格跨度，唔係想大家回頭責怪自己當初點解買、點解冇賣。
已經發生咗嗰一下，改唔到。但睇清楚之後，下一步點安排，仍然可以由自己慢慢諗。
科技股同傳統熱門股，有冇想像中差咁遠？
再望返龍頭科技股同傳統熱門股。
喺阿福呢個示範入面，100萬本金，最後分別剩54萬同64萬，相差約10萬。
換成蝕幅，就係約46%同36%，爭約10個百分點。
連呢個「隻隻最高位接貨、最低位離場」嘅極端示範，兩組平均都係相差約10個百分點。
所以，平時一聽到科技股就覺得好危險，一聽到傳統股就覺得好安心，我覺得值得重新諗吓：兩邊喺呢次示範入面嘅距離，有冇你原本想像中咁大？
傳統熱門股嗰邊，一樣可以令個倉縮水三成幾；龍頭科技股嗰邊，亦唔係隻隻都有幾百、幾千個百分點嘅價格跨度。
日常買賣各有入場價、倉位同持貨時間，結果自然唔會一樣。但至少呢組數字提醒我，唔好單憑「科技」定「傳統」呢個標籤，就將兩邊想像成「一邊好危險，一邊好安全」。
而且今次第三組，除咗銀行、保險，亦有資源股、消費股同盈富，唔係純粹一個銀行股組合。
我自己睇完，最直接嘅感覺係：叫佢科技股、傳統股，定係穩陣股，都只係研究嘅開始。最後仲係要睇返自己買緊乜、用咩價買，同埋買幾多。
10隻大型龍頭科技股高低位資料，方便大家對照及搵返關心嘅股份。
-聯想集團（00992）：37.88｜8.52港元｜345%。 -寧德時代（03750）：794.50｜326.00港元｜144%。 -小米集團-W（01810）：46.00｜21.30港元｜116%。 -中芯國際（00981）：93.00｜44.10港元｜111%。 -阿里巴巴-W（09988）：175.00｜88.65港元｜97%。 -騰訊控股（00700）：664.00｜378.00港元｜76%。 -美團-W（03690）：108.00｜63.65港元｜70%。 -比亞迪股份（01211）：113.40｜67.10港元｜69%。 -京東集團-SW（09618）：134.80｜95.80港元｜41%。 -中國移動（00941）：88.90｜75.55港元｜18%。
10隻傳統熱門股高低位資料，方便大家對照及搵返關心嘅股份。
-中國宏橋（01378）：41.36｜17.75港元｜133%。 -泡泡瑪特（09992）：274.20｜125.80港元｜118%。 -紫金礦業（02899）：46.98｜26.58港元｜77%。 -渣打集團（02888）：248.80｜146.50港元｜70%。 -滙豐控股（00005）：169.70｜101.20港元｜68%。 -中國銀行（03988）：6.29｜4.30港元｜46%。 -建設銀行（00939）：9.99｜7.37港元｜36%。 -友邦保險（01299）：92.15｜68.00港元｜36%。 -盈富基金（02800）：28.32｜22.92港元｜24%。 -香港交易所（00388）：444.80｜360.00港元｜24%。
AI嗰組，先至係另一個價格世界
去到AI嗰組，個跨度就明顯係另一個平行時空。
所以，睇到有人喺AI股賺大錢，唔使覺得自己錯過咗成個浪。
見到水哥嗰張成績表，亦要記得，同一段價格範圍，仲有阿福嗰個版本。
呢個距離，先係阿芒想大家睇清楚嘅嘢。
同樣係一行報價，同樣係自己真金白銀，唔同股票及產品嘅價格跨度，可以差好遠。
另外，AI嗰組包含兩隻每日兩倍槓桿產品，唔係18隻普通公司股份；比較時亦要記住呢個分別。
18隻熱門AI概念股及相關產品高低位資料，方便大家對照及搵返關心嘅股份。
-智譜（02513）：2,980.00｜116.10港元｜2,467%。 -XL二南方海力士（07709）：193.65｜10.31港元｜1,778%。 -群核科技（00068）：48.50｜2.77港元｜1,651%。 -XL二南三星（07747）：243.10｜20.66港元｜1,077%。 -建滔積層板（01888）：107.20｜10.50港元｜921%。 -長飛光纖光纜（06869）：305.00｜31.14港元｜879%。 -MINIMAX-W（00100）：1,330.00｜155.20港元｜757%。 -建滔集團（00148）：151.80｜25.10港元｜505%。 -天數智芯（09903）：295.83｜49.63港元｜496%。 -兆易創新（03986）：1,248.00｜220.00港元｜467%。 -五一視界（06651）：147.00｜35.00港元｜320%。 -瀾起科技（06809）：543.00｜152.70港元｜256%。 -華虹半導體（01347）：219.60｜61.80港元｜255%。 -勝宏科技（02476）：475.00｜135.90港元｜250%。 -壁仞科技（06082）：70.75｜21.70港元｜226%。 -快手-W（01024）：85.20｜26.68港元｜219%。 -劍橋科技（06166）：173.00｜60.60港元｜185%。 -中際旭創（03308）：1,322.00｜682.50港元｜94%。
數據說明：本文沿用上篇所列價格，上市未滿52周者，按上市以來區間理解。各組屬自行選取的比較名單，並非完整板塊樣本；平均數按每項未四捨五入的數值等權計算。示範忽略高低位出現次序及交易費用，並非實際可執行的歷史交易紀錄。歷史價格範圍不代表未來價格界限，本文只作資料整理及投資思路分享，不構成買賣建議。
心底話：現實入面，邊有人永遠行運，或者永遠黑仔？
講到呢度，要幫水哥同阿福講返句公道說話。
今次係阿芒安排佢哋，一個行運到盡，一個黑仔到盡，方便大家睇清楚兩端嘅距離。
現實入面，邊有人永遠行運一條龍？又邊有人注定一世做地獄黑仔王？
我哋可能旱幾個月似水哥，今個月就有啲似阿福。亦可能同一個倉入面，有啲股票買得靚，有啲就買完先發現自己睇漏咗嘢，或者入得太急。
所以，賺咗錢，唔使覺得自己天下無敵；蝕咗錢，亦唔使將自己判成「我就係冇投資命」。
講到尾，阿芒會用一句老土說話提醒自己：運氣一半，努力一半。
運氣嗰半，我控制唔到；努力嗰半，我會盡量做好。
研究盤生意、睇清楚估值、安排倉位，諗定如果自己睇錯，下一步準備點做。呢啲先係我可以落手做嘅功課。
水哥賺到錢，值得開心，但唔好因為一段順風，就覺得自己以後可以借大啲、買盡啲。
阿福今次失手，亦唔代表下一次一定冇機會。最緊要係整理返原因，唔好為咗急住翻本，再將自己推去更難承受嘅位置。
我哋唔使逼自己做足一世水哥，只希望就算有時撞正阿福嗰種際遇，都仲有本金、有心有力，繼續行落去。
投資思維：所謂「跌咗一半」，可以係兩回事
呢個就帶返我哋一直講緊嗰個問題：
「已經跌咗咁多，應該夠平喇啩？」
如果一隻股票，歷史高位係低位兩倍，股價由高位跌一半，就已經去到原本個低位。
但如果高位係低位八倍，由高位跌一半，個價仍然係原本低位嘅四倍。
同樣跌50%，一隻已經行到歷史區間嘅另一端，另一隻距離原本個低位，仲有好大段路。
所以，大家要多留意，唔單止係「跌咗幾多」，仲有你用緊邊個價做起點，眼前嗰段歷史價格範圍又有幾闊。
當我哋望住一個曾經好高嘅價，再望住而家個價，好容易覺得自己執到好大個折扣。
但嗰個折扣，究竟係盤生意真係平咗，定只係以前個價實在太高？
呢條問題，先值得我哋繼續追落去。歷史低位可以做參考，但唔係公司價值嘅答案。
And then what？下集睇美股
今集，我哋將紙上面嘅百分比，換成100萬本金，請水哥同阿福各行一次。數字睇清楚咗，And then what？
下集，我哋將同一條數，放落美股度睇。
好多人覺得，過去一年買美股，就好似行運一條龍；買港股，就好似做咗地獄黑仔王。
咁事實又係點呢？
如果將美國龍頭股嘅52周高低位攤開，水哥可以贏到幾多？阿福嗰邊又會係咩畫面？
個結果，會唔會同大家想像一樣？
唔靠印象，繼續用數字講。下集揭盅。
多謝大家睇到最後。如果覺得呢篇幫到你將一堆報價睇得清楚啲，請幫手畀個Like，再撳個關注支持吓阿芒。你哋每一下支持，都係我繼續研究、整理數據、寫落去嘅動力。
呢幾日出街，感覺秋天嚟啦，開始轉涼，幾舒服。各位出門記得帶定件薄Jacket。
市場慢慢睇，身體好好顧。See you tomorrow.