各位朋友，大家好，我係AI專業投資者阿芒。有揸貨、研究緊，或者只係想睇清楚AI板塊嘅朋友，呢個星期望住港股AI板塊一片「跌、跌、跌」，難免心都離一離；我哋可以做啲乜？係咪真係「有危就有機」？跌咗，係價格更吸引，定係件事本身出現咗問題？阿芒想同大家趁呢個時候擴闊研究名單，做足功課先知邊隻有危，邊隻有機。開始之前，麻煩畀個like + 關注。有你支持，我就更有動力繼續做功課，同大家逐間拆清楚。
有時我會串自己：大家成日聽我講智譜，講MiniMax、係咪心諗：「阿芒，你又講呢啲？講嚟講去都係嗰三幅被，個AI股票池係咪得咁細？」哈哈，熟悉嘅公司值得持續跟進，但做研究都唔可以永遠喺同一條街兜圈。平時同大家拆得最多嘅，係我經常討論嗰20隻港股AI熱門股。今次將鏡頭移開少少，整理另一批觀察名單，統一叫佢哋做「次熱門AI股」。今次帶大家行入隔籬幾條街，睇下聚光燈以外，仲有邊啲值得慢慢做功課嘅生意。提醒自己：熟悉可以帶來理解，但唔好變成視野嘅圍牆。
先講清楚，「次熱門」絕無貶義，絕對唔係話技術差一級、公司質素低一等，更唔係投資價值排名。呢個只係我嘅研究分類，主要考慮佢哋相對慣常討論嗰20隻股份嘅成交活躍度同市場關注度，唔係按市值劃線，亦唔係一個永久不變嘅標籤。未企喺聚光燈中央，有時反而係優勢。當一個故事街知巷聞，市場可能已經替未來增長標好價；如果一家公司產品有競爭力、商業化逐步落地，而估值未透支，提早做功課，先有機會「奇貨可居」。
講到呢度，我諗起《國產凌凌漆》嗰句：「你以為你匿喺度就搵你唔到咩？無用架！」真正出色嘅公司，好似漆黑中嘅螢火蟲一樣，咁鮮明，咁出眾，未有聚光燈照住，都慢慢透出自己嘅光。不過股票唔係阿漆，唔會配段音樂就自動畀人發現，「憂鬱嘅眼神、唏噓嘅鬚根」亦冇可能用嚟當業績。阿芒要搵嘅光，係產品有競爭力、客戶肯持續畀錢，同現金流開始跟得上。仲要睇買入價——公司再出色，如果股價已經係全場最耀眼嗰隻螢火蟲，投資回報一樣唔會出眾。
硬件基建：算力背後嘅生意
建滔集團（00148）
業務包括覆銅板、PCB、化工及物業等，AI受惠點主要喺高頻高速材料與電子供應鏈。要分清建滔集團同建滔積層板，亦唔好將整個集團當成純AI生意；我會睇產品組合同材料價格周期。講材料，我平時會用建滔積層板（1888）作為上游觀察窗口，今次亦可以由景旺嘅PCB產品升級，睇另一段受惠路徑。不過建滔集團本身係建滔積層板嘅母公司，唔適合寫成擂台對手；重點係分清集團同子公司嘅業務組合，而唔係硬問邊個打贏邊個。
ASMPT（00522）
賣半導體封裝及電子製造設備，AI關聯主要來自先進封裝、HBM記憶體及光互連。可以理解為幫高性能芯片完成精密組裝。我會留意新訂單、客戶驗證，以及設備需求有冇被提前透支。
納真科技（09856）
提供光芯片、光模組及光網絡終端，角色係幫數據高速傳輸。數通光模組已成重要業務，但數通需求亦包括雲計算，唔可以全部當成AI收入。我會同步睇產品升級、備貨同現金回流。
地平線機器人－W（09660）
核心係智能駕駛芯片、計算架構及配套軟件，唔好見到「機器人」三個字，就以為主業係人形機器人。我會由汽車量產切入，睇車型搭載、芯片出貨同研發回報。
優必選（09880）
主題係智能機器人，人形機器人產業化尤其受關注。我唔會只睇機器人行得幾靚，而係追問工廠客戶願意付幾多錢、可以代替邊啲工序，以及交付之後仲有幾多服務成本。
講終端，小米（1810）將AI帶入手機、家居同汽車，聯想（0992）連接電腦及企業設備；優必選走嘅機器人路線，就係另一種將AI帶入現實嘅方式。佢哋唔係同一場產品比賽，次熱門要升呢，未必需要複製小米或聯想，而係要證明自己嘅產品真係有人用、有人買。
英諾賽科（02577）
做氮化鎵功率半導體，重點唔係幫AI思考，而係提升電力轉換效率，產品可以用喺數據中心伺服器電源及芯片供電。我會睇客戶導入點樣變成量產，同產能利用率能否改善。
講芯片，中芯國際（0981）同華虹半導體（1347）站喺晶圓製造環節，但製程同產品組合唔一樣；壁仞科技（6082）則主攻GPU同AI算力系統，偏向計算引擎。返到今次名單，地平線、ASMPT、英諾賽科就分別涉及智駕芯片、封裝設備同功率器件。佢哋未必係直接對手，但可以靠自己嗰道工序，爭取更重要嘅產業位置。唔使每間都變成另一個中芯，先值得研究。
景旺電子（03228）
主要做印刷電路板，即PCB，汽車電子係重要根基，亦拓展AI伺服器、高速光模組等應用。佢唔係造AI芯片，而係提供電子設備需要嘅互連載體。要睇高端產品放量，有冇同步改善毛利同現金流。
曦智科技－P（01879）
聚焦光互連及光計算，方向係改善AI算力系統嘅傳輸與計算效率。呢類硬科技要分清技術突破、客戶驗證同規模量產，三個階段唔可以混為一談；技術有前景，唔代表盈利即刻跟上。
講數據傳輸，中際旭創（3308）可以同納真對照研究；長飛（6869）嘅光纖道路，同曦智嘅光互連、光計算，則要分清技術及應用。唔好一個「光」字就當晒同業，亦唔好將不同環節嘅受惠程度畫上等號。先認清產品，再比較競爭力。
金山雲（03896）
提供雲計算、儲存及相關服務，並發展AI智算雲。佢更似提供AI運作需要嘅計算資源，而唔係直接賣模型。我會睇算力投入、利用率同收入回收，避免只見收入增長，忽略資本開支。
生命科技科研平台：計到仲要驗到
晶泰控股（02228）
結合AI、物理計算、雲計算及機器人實驗，用喺藥物與材料研發。佢嘗試接通「電腦預測」同「實驗驗證」。我會睇合作能否持續擴大，以及平台有冇真正提升研發效率。
劑泰科技－P（07666）
外號「全球AI藥物遞送第一股」，核心係NanoForge納米遞送平台，主攻AI驅動納米材料、藥物製劑及遞送系統，研究藥物點樣更有效送到適當位置。分析時，我會將平台合作、授權首付款、里程碑同產品銷售分清楚，唔會全部當成穩定收入。
軟件應用：客戶肯唔肯續費
迅策（03317）
本業係實時數據基礎設施，以AI Data Agent為核心，由數據獲取、清洗、標準化到大模型調優；金融資管實時數據市佔11.6%、行業第一。但隻腳已經踩得好深：9月3日推出TokenCloud訓練／推理一體平台，股東大會通過最多120億元人民幣起算力中心，配套最多100億元人民幣銀團貸款。我會分開兩條數：原有軟件生意嘅複製能力，同新基建嘅資本開支風險，後者明顯重要得多。
美圖公司（01357）
將AI放入影像、影片及設計工具，再透過訂閱變現，係較容易理解嘅應用模式。我會睇用戶願唔願意持續付費，以及新功能帶來嘅收入，能否覆蓋推理與研發成本。
金蝶國際（00268）
原有根基係企業管理軟件及雲服務，再將AI嵌入財務、供應鏈、製造等流程。佢唔係冇AI就冇生意，而係睇AI能否令既有產品更有價值。我會留意付費轉化、續約同增購。
五一視界（06651）
做數字孿生同仿真，將現實環境變成數字副本，畀汽車、機器人訓練、測試、驗證，先喺虛擬世界操練，再落場。51Sim喺國內高階智駕仿真同數據平台市佔53.5%、行業第一；強制國標已將仿真列為L3准入嘅硬性前置。我會睇平台可唔可以重複使用，而唔係每個項目重新砌。
匯量科技（01860）
核心係程序化廣告，Mintegral利用AI及機器學習改善投放、出價同變現。佢賣嘅唔係聊天機械人，而係更有效率嘅廣告匹配。我會睇廣告主回報、平台毛利同流量成本。
講平台，騰訊（0700）同阿里（9988）有龐大用戶及生態，但次熱門公司唔一定要複製另一個微信、淘寶。美圖、匯量、金蝶等公司，可以喺創作、廣告或企業管理場景做深，先守住一塊有價值嘅市場。規模未必一樣，產品能否持續變現，先係共同要答嘅問題。
海致科技集團（02706）
主打知識圖譜結合大模型，先整理企業資料之間嘅關係，再提供問答、推理及智能體方案。我會睇客戶係做完一次項目就離場，定將平台融入日常工作、持續使用。
範式智能／原第四範式（06682）
提供企業級AI平台及行業方案，將建模、部署同應用串埋。我最關心嘅唔係做過幾多項目，而係累積嘅技術能否複製到下一個客戶，減少重複交付成本。
邁富時（02556）
即珍島集團Marketingforce，將AI落到營銷、銷售、客服等場景，官方而家叫「全棧Token工廠」。呢類產品要問得直接：客戶用完有冇慳到時間、多咗成交？有可量度回報，先有理由持續畀錢。
滴普科技（01384）
一邊FastData數據平台，一邊DeepWorks智能體平台同Deepexi企業大模型，幫企業將資料接入AI工作流程。我會分清收入來自標準產品，定大量度身工程——兩者嘅擴張能力好唔同。
明略科技－W（02718）
由企業數據智能出發，將AI用喺營銷、銷售及營運，亦發展智能體。技術展示可以吸引眼球，但我更關心客戶有冇續單，以及效果能否持續量度。
呢個領域，２７２３同２０係我經常追蹤嘅代表，但範式、海致、滴普未必需要鬥通用模型邊個最叻。將AI接入企業流程，令客戶持續付費，一樣可以建立自己嘅位置。唔一定要整出最出名嗰個腦，先可以做出一門好生意。
想投資行得長，先要認識自己
以上就係今次整理嘅次熱門梯隊港股。下一步，我想睇嘅唔只係邊隻突然多人講，而係邊間有機會靠真實生意，慢慢行入市場聚光燈。研究呢批次熱門AI股，係想透過持續學習同獨立思考，搵到市場仲未睇清楚嘅價值；創新唔一定係發明新科技，改善流程、重組資源、用新方法解決舊問題，一樣可以創造機會。學歷同專業訓練可以幫我哋建立系統知識，但只係起步優勢，唔係人生上限，正如公司有幾多博士、管理層出身邊間名校，都唔可以代替產品、客戶同現金流。真正重要嘅，係有冇將知識變成解決問題嘅能力，再將能力變成實際成果；投資亦一樣，我要講得清楚市場忽略咗乜、自己有乜證據，同埋乜情況出現就要修正判斷。人生想彎道超車，唔係靠跟風，亦唔係靠逢人反對，而係慢慢建立自己嘅思考方式：廣泛做功課、少數落注，唔明就承認，證據未夠就等，等真正值得把握嘅機會出現時，自己已經準備好。
講到底，整理呢份22個席位嘅次熱門AI觀察名單，係為咗擴闊視野，唔係增加22份焦慮。一個專業投資者如果有心想趁早做10年、甚至更長時間嘅價值投資，除咗管住貪心，我更想學識減少精神內耗：唔因為錯過一隻急升股就懊悔幾日，亦唔為未發生嘅調整，喺腦海預演十次恐慌。市場每日都有雜音，我哋唔需要逐一回應。將注意力拉返去企業盈利、現金流、估值，同自己承受得到嘅風險；機會未到就等，判斷有錯就改。卸低無謂包袱，先有心力做好功課，亦有耐性畀時間同複利發揮作用。
今日未必見到成果，但幾年後回望，真正改變我哋嘅，可能唔係某隻爆升股，而係一直冇放棄嘅好習慣。
同時，一定要對自己好啲，時刻提醒自己：股票值得研究，生活亦值得用心。放低個盤一陣，食餐飯、行個圈、陪下身邊人。我哋投資，係想為人生增加選擇，唔係令人生只剩低股價。投資有時真係幾孤單，特別係市場嘈到乜都聽唔清嗰陣：人人都有答案，自己反而愈睇愈迷惘。我會繼續每日同大家由業績、數字到估值，一步一步睇清楚；有證據就講，有疑問就拆，未睇得明就唔勉強落結論。
……等等，睇得細心嘅朋友可能已經發現：「阿芒，你又話22隻，點解數嚟數去得21隻？係咪掛住講AI，連數都計錯？」哈哈，今次唔係計錯，係我預早留定咗第22個位畀Kimi。將來有合適嘅正式資料，再用同一把尺做功課：產品有冇競爭力、客戶肯唔肯畀錢、收入點樣變成現金，同埋估值有冇透支，一樣都唔少得。張櫈就留好咗畀Kimi仔，但唔係話佢拎住杯Dry Martini入場，就可以自動坐低。佢可以有憂鬱嘅眼神、唏噓嘅鬚根，但份功課唔該始終要交齊。產品、收入、現金流，同埋估值，少一樣都要再問清楚。
投資亦一樣，唔好見到漆黑中有隻螢火蟲，就即刻追住佢跑；先睇清楚佢發緊光，定係自己眼花。
好啦，今日功課做到呢度。豬肉刀留返畀星爺，阿芒冇神乎其技嘅刀法，只有盡量練好對眼，逐份公告慢慢拆——螢火蟲我哋可以慢慢搵，本金唔好亂咁畀人劏。
Disclaimer：本人為香港《證券及期貨條例》（第571章）下的個人專業投資者（PI）。PI 的其中一項法定資格，是持有不少於800萬港元或等值外幣的投資組合。本文只屬資訊分享及市場觀察，不構成投資建議。覺得呢份同行有價值，歡迎關注。