有時睇富途，
會見到有啲人個 profile有個「PI 」標記。
全名係：
Professional Investor
專業投資者
聽落好勁。但其實，佢唔係一份職業。
PI 唔代表你係基金經理。
唔代表你買親都贏。
更加唔代表你講邊隻，邊隻就會升。
佢只係香港金融制度入面，
一個關於資產規模嘅分類。
講返正式一啲：根據《證券及期貨條例》（第571章）及《證券及期貨（專業投資者）規則》（第571D章），個人如喺最近12個月內，持有唔少於800萬港元（或等值外幣）嘅投資組合，經審核後，即可認證為PI。
阿芒當年，
同兩個大學同學夾錢開 PI 戶口。
阿芒出100萬。
做律師嘅 KC 出100萬。
第三個朋友，出得最多——600萬。
三個人加埋，剛剛好 800 萬。
唔係基金。冇收人哋錢。
只係三個舊同學，各自擺啲身家落枱。
點解要夾？
因為 PI 唔係畀你買牛熊證、窩輪嗰種人人都買得嘅產品。
牛熊證、窩輪、上市股票期權，散戶一樣買到，唔需要 PI。
你要過咗 PI 呢條線，
銀行、券商先可以同你傾一啲，
唔喺交易所掛牌、條款可以另訂嘅產品。
例如：
同個別公司股價掛鈎嘅股票掛鈎票據；
同某間公司會唔會違約掛鈎嘅信貸掛鈎票據；
又或者為大戶度身設計嘅結構性交易。
PI 唔係一張「我好叻」證書。
佢比較似一張入場券。
過咗 PI 條線，
你未必即刻買到所有嘢。
但有啲只會向特定客戶介紹嘅交易，
你終於有資格坐低聽。
亦有啲嘢，
有機會令你一夜間，
由中產變負資產。
以下,
係3個恐怖例子。
Accumulator 累計期權合約
2008年令唔少PI變PK嘅產品。
業內人叫佢做「阿Q」，
或者「I kill you later」。
機制好簡單：
股價跌得越深，
你要買得越多、越貴。
賺，封頂。
輸，無底。
賣出CDS保護
即係做CDS（信貸違約掉期）嘅賣方。
收取定期保費，同時承諾如果指定公司違約就要賠錢畀買方。
利息，好誘人。
但2008年9月， 雷曼兄弟破產，
觸發近4,000億美元 CDS賠付義務。
AIG因過度出售CDS保護且未充分對沖,
要靠美國政府850億美元貸款先頂得住。
FX Accumulator 外匯累計期權
賭嘅係匯率。
2008年金融海嘯，
澳元、紐元等商品貨幣急跌。
中信泰富，
一間香港上市公司，
因為做呢類外匯衍生工具，
單一年度蝕咗超過20億美元。
呢啲客戶，
好多本身已經係PI，
甚至身家豐厚。
「但PI，只係由表界，通往裡界，嘅一道門。」
打開嘅，
係一個更兇猛嘅世界。
過咗門，
你有資格接觸，
但唔代表，
你有能力駕馭怪獸。
講返富途，而家啲資訊，多到睇唔切。
財經 KOL、投資達人、AI 分析、觀點、預測，一撳就有。
但有一樣嘢，始終生成唔到：
一個人，有冇擺過真金白銀落場。
Profile有個 PI logo，
你至少會知道：
佢過咗一條 8 球嘅資產門檻。
有 PI，唔代表講嘅一定啱。
冇 PI，亦唔代表冇料。
投資世界，人人都可以發表意見。
呢個 logo， 唔係答案。
只係多一項參考資料。
PI 唔係答案。
只係一個開始。
至於出600萬嗰位朋友
當年仲係大學同學。
今日喺香港，
已經係一個呼風喚雨嘅人物。
佢個故仔，
遲啲再講。
